مصلحة الجمارك المصرية، أطلقت تطبيق “تليفوني” لتسجيل الموبايلات المستوردة من الخارج وغير المعتمدة. التطبيق موجود على متجر تطبيقات أندرويد و iOS، فالمستخدمين وتجار الموبايلات هيقدروا يسجلوا أجهزتهم بسهولة من عليه ويدفعوا الضريبة المقررة على تليفوناتهم في حالة وجودها.
كمان المسافرين هيسمح ليهم إنهم يدخلوا جهاز واحد بس في المطار، بشرط تسجيله في منفذ مخصص لده، علشان يتجنب انقطاع الخدمة عنه، وفي حالة لو دخلت أكتر من جهاز ساعتها هيتم تطبيق الرسوم الجمركية عليه.
القرار هيطبق على الموبايلات الجديدة اللي هتدخل السوق من بداية السنة 2025، وهيتم انقطاع الخدمة عن أي جهاز غير مسجل هيدخل، والرسوم الجمركية هتكون قيمتها 38% من قيمة الجهاز، تتسدد في مهلة 3 شهور.
ودي طريقة استخدام الأبلكيشن: لو موبايلك أندرويد حمل الأبلكيشن من اللينك ده: https://play.google.com/store/apps/details?id=com.ntra.citizen
أما لو موبايلك أيفون نزل الأبلكيشن من اللينك ده: https://apps.apple.com/us/app/telephony/id6739450752
ودي هي الخطوات بالنسبة لمستخدمين الأندرويد:
اطلب رقم *#٦٠# وهيظهر ليك رقم IMEI بتاعك، أو لما تفتح قايمة “الإعدادات” وتختار “About Phone” وبعد كده تختار “الحالة” دور على مدخل MEID أو IMEI في القايمة.
أما لو كنت أيفون: فأنت تقدر تاخد رقم IMEI من خلال إنك تدخل “الإعدادات” وتختار “عام” ودور على “الرقم التسلسلي” وانزل تحت شوية علشان تلاقي أرقام IMEI/MEID وICCID
وبعد نسخ رقم IMEI، روح لتطبيق “تليفوني” وانسخ الرقم علشان تتأكد من حالة موبايلك، وساعتها الأبلكيشن هيقولك إذا كان موبايلك متسجل ولا لا.
التعليقات