الدكتور أحمد الخطيب يوضح ما الفرق بين فيروس الكورونا وفيروس الانفلونزا

حرص الدكتور المصري أحمد الخطيب مدرس مساعد طب الأطفال وحديثي الولادة كلية طب جامعة الأزهر وعضو الأكاديمية الأمريكية للحساسية والمناعة، على توضيح الفرق بين فيروس الكرونا وفيروس الأنفلونزا، خاصة بعد انتشار هذا الفيروس في جميع دول العالم خاصة الدولة الصينية.

ويوضح الدكتور أحمد عبر السطور التالية ما الفرق بين الكرونا والأنفلونزا:

 يقول أحمد، إن فيروس الكورونا بالذات وعلى عكس باقي الفيروسات التنفسية بيجي بصورة اخف جدا في الاطفال مقارنة بكبار السن، مضيفًا أن حالات الاصابة في الاطفال اللي اقل من ٥ سنوات نادرة جدا، و مشيرًا إلى أن الاطفال في المرحلة العمرية دي محميين بصورة طبيعية (السبب غير واضح حتى الان) و مش بيلقطو العدوى بسهولة زي الكبار.

وأَضاف الخطيب، أن معدل الوفيات في الاطفال اقل من ١٠ سنوات بسبب الكورونا، صفر، حيث لم يسجل اي حالات وفيات بين الاطفال في العالم بسبب الكورونا (عكس الانفلونزا العادية و غيرها من الفيروسات الاخرى المسببة لعدوى الجهاز التنفسي) ،موضحا أن الفيروس لما اصاب طفل حديث الولادة (عنده ١٣ يوم بس) ماحتجش اي علاج نهائي و لم تظهر عليه اي اعراض تقلق،  وخف منه من غير اي تدخل طبي، قائلاً” يبقى مبدأيا نطمن كده على ولادنا لأن ان شاء الله معدل الخطورة عليهم منخفض جدا حتى مقارنة بالانفلونزا العادية”.

كما حرص الدكتور أحمد الخطيب على جاوب السؤال كورونا ولا مش كورونا ؟

يكشف الدكتور أحمد عن أهم عرض لازم يصاحب مريض الكورونا اللي هتظهر عليه اعراض المرض (مش الحاملين اللي مش هتظهر عليهم اعراض اصلا) هو ارتفاع درجة الحرارة، (٩٨.٩٪؜ من مصابي الصين – ١٠٠٪؜ من بمصابي باقي دول العالم)، مفيش كورونا من غير سخونية، طفلك اللي مخنفر و بيكح طول ما هو مش بيسخن يبقى ان شاء الله منقلقش..اهم تأني عرض هو الكحة الجافة (Dry cough) اللي موجودة في ٧٥٪؜ من المصابين ، موضحًأ أن التاريخ المرضى لمعظم المصابين بيكون عبارة عن ارتفاع في درجة الحرارة لمده كام يوم، يليه كحة جافة، كحة ببلغم حاجة نادرة نسبيا مع مريض الكورونا و عمرها ما تكون هي اول الاعراض.

  عكس دور البرد و الانفلونزا لسبب مش معروف تأثير الفيروس اقوى ما يكون بيكون على اغشية الرئة فقط و اكثر بكتير من تأثيره على باقي اغشية الجهاز التنفسي ،، فاعراض الرشح و الخنفرة و المناخير السايبة بتطمنا اكتر و تقول ان الطفل غالبا عنده برد عادي جدا ،، في واحدة من الدراسات بتقول ان الرشح كان موجود في ٤٪؜ فقط من المصابين ! ابنك اللي بيخنفر ويبربر إن شاء الله عنده برد عادي جدا زي اللي بيجيله كل سنة، اطمني، مش كورونا.

 الغالبية العظمى من المصابين بيه لازم يتوفر فيهم شرطين:

 ١.كان ليهم تاريخ مرضي بالسفر للدول الموبؤة أو

 ٢.الاختلاط مع اشخاص مصابين، عدد الحالات اللي اكتشفوها بدون ما يتوفر فيهم الشرطين دول نادرين جدا و يعدو على اصابع اليد الواحدة،

فلو حضرتك مش بتاخدي كل فترة جولة سياحية بتلفي فيها على الصين تطلعي منها على كوريا و تقضيلك بعديها يومين استجمام في ايطاليا او فرنسا، يبقى نسبة أن الاعراض اللي بيعاني منه ابنك دي تبقى كورونا تقترب من الصفر، الكلام ده الى الآن، وإن شاء الله تفضل كده و أن كان مش اكيد هتفضل.

 أعراض الخطر:

1- كحة جافة مستمرة اكتر من ٥ ايام ومعندناش حاجة تفسرها يصاحبها ارتفاع في درجة الحرارة

2- صعوبة في التنفس ونهجان.

3- تغير في لون الشفايف الطبيعي الى اللون الأزرق.

4-  همدان شديد وعدم القدرة على بذل اي مجهود مع تكسير في الجسم.

5- فقدان شديد للشهية مع صعوبة في البلع.

6- اضطراب في درجة الوعي.

ويضيف الخطيب، أن الموضوع بالنسبة للأطفالغير مقلق تمامًا، قائلاً ” انتي تقلقي على ابنك من الانفلونزا العادية اكتر بكتير من الكورونا، خنفرة ورشح زي الموجودة عند كل الاطفال طول السنة ولا نحطها في بالنا”.

ويوضح أن غسل ايدينا كويس بالصابون باستمراو و نداري بقنا و مناخيرنا و احنا بنكح و نعطس (المفروض ان كلنا بنعمل كده) و نبعد عن التجمعات في الاماكن المغلقة و ان شاء الله كلنا هنبقى في السليم.